IGIHE Kinyarwanda

{Fondation KMP (Kizito Mihigo pour la Paix / Kizito Mihigo for Peace) iratangaza ko igiye kujya igeza ku Banyarwanda ikiganiro gishya cyitwa UMUSANZU W’UMUHANZI, kizajya kinyura kuri Televiziyo y’u Rwanda – TVR buri wa kabiri w’icyumweru cya mbere n’icya gatatu by’ukwezi, guhera i saa yine z’ijoro (22h00). Iki kiganiro kizajya kiyoborwa na Kizito Mihigo ubwe, kizajya gitumirwamo abahanzi banyuranye, abayobozi b’amadini, n’abandi bantu b’ingeri zinyuranye bakora ibikorwa bitanga umusanzu wubaka muri Sosiyete Nyarwanda.}

Nk’uko umuhanzi Kizito Mihigo yabidutangarije, iki kiganiro ngo kigamije kwerekana uruhare rw’abahanzi mu kubaka ikiremwamuntu, no mu kubaka Sosiyete Nyarwanda, bityo bikabahesha agaciro.

Kizito Mihigo yagize ati: “Agaciro k’umuhanzi muri sosiyete kazagenda kiyongera bitewe n’uko akamaro ke muri sosiyete nako kiyongera. Iyo abahanzi bahanze ibintu bidafitiye sosiyete akamaro, sosiyete nayo irabajugunya ikabima agaciro. Kugira ngo rero Sosiyete Nyarwanda yubahe umuhanzi w’Umunyarwanda, uwo muhanzi agomba gutangira kugaragaza akamaro ke mu kubaka igihugu n’abagituye.”

Kizito Mihigo akomeza agira ati “Abanyarwanda nibamara kumva ko
ibihangano byacu birimo agaciro n’akamaro gakomeye, nabo mbere yo
kubyiba no kubikoresha uko bishakiye, umutimanama wabo uzajya
ubakomanga kurushaho. None se abantu biba ikaramu bangana n’abiba
ordinateur ? Mudasobwa yibwa n’igisambo cyabigambiriye kandi bigitera
ubwoba kuko akamaro n’agaciro kayo nako kisumbuyeho. Ariko mu
banyeshuri no mu biro kwiba ikaramu bigeraho bikaba nk’umukino cyangwa
nk’ikintu cyemewe. Aha ndashaka kuvuga ko nta kibabaje nko kubona mu Rwanda abahanzi bakomeje gufatwa nk’abagererwa kandi bafitiye Umuryango Nyarwanda akamaro kadasimburwa. Agaciro kabo rero gakwiye kugaragazwa kandi nibo bagomba kuba aba mbere mu kukagaragaza”.

Umuhanzi Kizito avuga ko Fondation ye itanga ubutumwa bw’Amahoro ubumwe n’ubwiyunge hirya no hino, ururimi rwayo cyangwa imvugo yayo ni ubuhanzi. Ati “Nk’uko rero umuhinzi atakwemera ko umuntu amuvunira isuka, muri KMP natwe tuzakora uko dushoboye kugira ngo iyo myumvire ku buhanzi mu Rwanda, ive kuri sagihobe igere ku munyamwuga ubyubahirwa, kimwe n’uko abandi bakora indi myuga, ikabahesha agaciro.”

Kuri uyu wa kabiri tariki ya 07 Gasyantare 2012, Fondation KMP izatugezaho ikiganiro yagiranye n’abatumirwa bayo banyuranye, barimo Mufti w’ u Rwanda Sheih Abdoul Karim Gahutu, ndetse na Musenyeri Siliviriyani Nzakamwita, umushumba wa Diyosezi Gatulika ya Byumba. Ibi ngo biri muri gahunda yabo bise: IKIGANIRO MPUZAMADINI. Kizito Mihigo yatumiye n’abahanzi bagenzi be muri iki kiganiro, nka Dieudonne Munyanshoza bakunze kwita MIBIRIZI, na Eric Senderi. Muri iki kiganiro kandi, hazagaragaramo abanyamuryango ba Fondation KMP babaza ibibazo abo batumirwa.

{{Dore Video y’ itangazo ry’icyo kiganiro kuri Televiziyo y’u Rwanda:
}}

Ushaka kumenya byinshi kuri KMP, wasura urubuga www.kmp.rw, ushaka kumenya byinshi kuri Kizito Mihigo wasura http://kizitomihigo.com/