IGIHE Kinyarwanda

{Mu gihugu cya Misiri hamaze kubarurwa abantu barenga 70 batakaje ubuzima, abandi barenga igihumbi barakomereka bikomeye nyuma y’umukino w’umupira w’amaguru waberaga mu Mujyi uherereye ku kirwa cya Said.}

Muri uyu mukino wabaye ku mugoroba wo kuri uyu wa gatatu tariki ya 1 Gashyantare 2012, wahuzaga amakipe ya al-Masry na Al Ahli imwe mu ikipe ikomeye muri shampiyona yo mu gihugu cya Misiri, wabaye ishiraniro kugeza ubwo uhitana abantu benshi kuri ubu buryo, ibi akaba ari ubwa mbere bibaye mu mateka ya Misiri aho abafana basubiranamo bakicana.

Ubu bwicanyi bwabaye nyuma y’umukino wahuje aya makipe yombi, umukino warangiye al-Masry itsinze ibitego bitatu kuri kimwe ikipe Al Ahli,u bwo imvuru zitangira ubwo.

Mu ijambo yavugiye kuri Televiziyo y’igihugu, Minisitiri Wungirije ushinzwe ubuzima Hesham Sheiha, yatangaje ko ibi bibabaje cyane. Yagize ati”:Ibi ni akaga gakomeye, ni impagarara zikomeye mu mateka y’umupira w’amaguru mu gihugu cya Misiri”

Bamwe mu babonye uko izi mvururu zatangiye, batangaje ko umufana wa Ahli yagaragaje icyapa kigargaraho amagambo asebya (atuka) icyambu cya Said, bidatinze umufana wa Ahli amanuka mu kibuga yitwaje igisa n’inkoni (an iron bar), ubwo abafana benshi ba Al-Masry binjira mu kibuga batangira gukubita abakinnyi b’ikipe ya Ahli, inkundura y’imyivumbagatanyo yahitanye imbaga y’abantu itangira ityo.

Ibiro Ntaramakuru by’u Bwongereza Reuters, byatangaje ko abakomeretse bari gutabarwa boherezwa mu bitaro hifashishijwe indege za kajugujugu.

Umwe mu bakinnyi ba Ahli witwa Mohamed Abo Treika yagize ati:”Uyu si umukino w’umupira w’amaguru, ndabona ari intambara, urabona ko abantu bari gupfira mu maso yacu, nta mutekano, nta nkeragutabara”.

Ababonye neza ibyabereye kuri iki kibuga, bemeje ko benshi mu bahatakarije ubuzima harimo abapolisi bari bashinzwe kurinda umutekano.

{{Amwe mu mafoto}}

{{Photos:breakingnews.ie na theaustralian.com.au}}