IGIHE Kinyarwanda

{Mu gikorwa cyabereye kuri sitade nto y’i Remera kuri uyu wa 12 Mutarama, Minisiteri y’umutekano mu gihugu yakoze imurika ry’ibikorwa byayo.
}

Iri murikabikorwa ryari rifite umutwe ugira uti: “Tumenye inshingano za MININTER, tugire uruhare mu mutekano n’uburenganzira bwacu”. Nyuma yo gusura ibikorwa by’iyi minisiteri, Minisitiri w’umutekano mu gihugu Sheikh Musa Fazil Harelimana yagiranye ikiganiro n’abari bitabiriye iri murikabikorwa.

Hagaragajwe n’ibice bigize iyi minisiteri harimo Urwego rw’Igihugu Rushinzwe Kugenzura Imfungwa n’Abagororwa (RCS) ndetse na Polisi y’igihugu (RNP).

Muri iki kiganiro cyari kiyobowe na Minisitiri w’umutekano mu gihugu Sheikh Musa Fazil Harelimana, hagaragajwe inshingano z’iyi minisiteri zirimo gutegura politiki y’umutekano mu gihugu, gutegura amategeko ayishyira mu bikorwa, gushyiraho ubushobozi mu kugenzura ishyirwa mu bikorwa ry’iyi politiki ndetse n’amategeko ayigenga, kwemerera ibigo byigenga bikora akazi ko kurinda umutekano kwinjiza mu gihugu ibikoresho byifashishwa harimo imbunda n’ibindi.

Minisitiri Sheikh Musa Fazil yavuze ko gucunga umutekano bitareba Polisi n’abacungagereza gusa ati: “Ni ibya buri Munyarwanda wese hatagombereye ngo uyu yambaye uniforme uyu ntayambaye; amahoro iyo abuze mu gihugu bigera kuri buri Munyarwanda wese, umutekano twese uratureba”.

Abari bitabiriye ikiganiro, abagikurikiranaga ku maradiyo no kuri televiziyo babajije ibibazo byibandaga ahanini ku mutekano mucye urangwa mu duce tumwe na tumwe two mu mujyi wa Kigali cyane cyane mu gace ka Nyabisindu gaherutse guterwamo gerenade.

Ikindi kibazo ni kuba urumogi rumaze kuba akarande mu rubyiruko; aha agace ka Kabeza kakaba karatunzwe agatoki bivugwa ko urumogi rumaze kuba rwinshi mu bana bato.

Kuzamurwa mu ntera ku bacungagereza, amafaranga atarishyuwe abacungagereza igihe baherekezaga imfungwa mu nkiko gacaca, itangwa ry’impushya zo gutwara ibinyabiziga, ihohoterwa risigaye rikorerwa abagabo, inzoga z’inkorano zimaze guhindura abagabo ibiremba n’ibindi ni bimwe mu bibazo byagarutsweho.

Nkuko uhagarariye Polisi mu mujyi wa Kigali Chief Supt. Rutikanga Rogers yabivuze, agace ka Nyabisindu ubu karahagurukiwe kandi arasaba abaturage kugira ubufatanye na Polisi mu kwerekana abahungabanya umutekano no kuyitabaza igihe babonye umuntu udasanzwe cyangwa batamenyereye.

Ku kijyanye n’urumogi, hasobanuwe ko igikorwa cyo kururwanya cyatangiriye mu midugudu kandi bikomeje. Abari bitabiriye ibi birori basabwe kumenyesha Polisi aho iki kibazo kigaragara hose.

Kuzamurwa mu ntera byakorewe abacungagereza bo muri ibi bihe, mu gihe abo mu bihe byashize batigeze babikorerwa. Minisitiri w’umutekano yavuze ko bikigwaho kuko itegeko ryo gushyiraho abahagarariye abacungagereza ryari ritarajyaho, mu gihe gito bizaba byakemutse. Abacungagereza batishyuwe igihe baherekezaga imfungwa muri gacaca, Sheikh Musa Fazil Harelimana yavuze ko amafaranga y’abo amaze kugera ku makonte y’amagereza bakoragaho mu gihe gito bazayahabwa.

Ku itangwa ry’impushya zo gutwara imodoka ndetse no guha agaciro impushya zatangiwe mu bindi bihugu, aha Umukuru w’ishami rya Polisi rishinzwe umutekano wo mu muhanda Chief Supt. Twahirwa Celestin, yavuze ko gutanga impushya byoroshye kuko abantu basigaye bakoresha amatelefoni yabo mu kwiyandikisha, naho impushya zatangiwe ahandi zihabwa agaciro igihe ugaragaje ibimenyetso byaho wayikoreshaga mu gihe kitarenze umwaka bakaguhindurira.

Abagabo basigaye bahohoterwa basabwe kudaceceka, bagatabaza abashinzwe umutekano igihe bahohotewe, naho ku bijyanye n’inzoga z’inkorano zimaze guhindura ibiremba bamwe mu bagabo bazinywa, Minisitiri Fazil yavuze ko kuzimena bidahagije abazicuruza bakwiye kuzajya bafatwa bagahanwa .

Mu gusoza iyi nama Minisitiri yasabye abari bayitabiriye harimo n’urubyiruko kwirinda gukora ibinyuranije n’itegeko kuko umuntu abayikururira ibibazo