IGIHE Kinyarwanda

{Ubwo yari mu Ihuriro ry’ishyaka FDC (Forum for Democratic Change) Muganga Dr Kizz Besigye yatangaje ko atazongera guhangana na Perezida Museveni.}

Muganga Besigye wahoze ari umusirikare aho yari afite rya colonel, yatangaje ko atazongera guhangana na Perezida Museveni binyuze mu matora nyuma yo kubikora inshuro eshatu ntashobore kugera ku ntego ze, aha akaba yarahanganye na Perezida Museveni mu matora ya 2001, 2006 ndetse no mu 2011.

Besigye wigeze kuba muganga wa Perezida Museveni mu gihe kigera ku myaka itandatu dore ko yari muganga we kuva mu mwaka w’1980 kugera 1986, yagize ati ”Mbere hose navuze ko ntazigera nicara igihe cyose Museveni akiri Perezida kuko ari umunyagitugu, nitugira amatora mu mwaka w’2016 sinziyamamaza mu gihe Museveni akiri ku butegetsi”.

NK’uko ikinyamakuru The New Vision dukesha iyi nkuru cyabitangaje, Besigye yatangarije ibi mu kiganiro ishyaka rye rigirana n’abanyamakuru buri cyumweru kuwa mbere, ari ku cyiciro gikuru cy’iri shyaka giherereye ahitwa Najjanakumbi mu mujyi wa Kampala.

Besigye yashimangiye ko ishyaka rye rishobora guhitamo undi munyamuryango wazarihagararira mu matora y’umukuru w’igihugu, kuko yumva afite uburenganzira bwo kujya guhatana mu matora. Gusa byose bizaturuka ku mahitamo ye yaba ayo kwiyamamaza cyangwa se kubireka.