IGIHE Kinyarwanda

{Nk’uko bitangazwa mu cyegeranyo cyakozwe n’abacamanza Marc Trévidic na Nathalie Poux, ibisasu byarashe indege yarimo Perezida Juvénal Habyarimana byaturutse mu kigo cya gisirikare cya Kanombe cyacungwaga n’abamurindaga.}

Ikinyamakuru Le Nouvel Observateur cyatangaje kuri uyu wa Kabiri ko ibi byasohowe n’abacamanza bashinzwe kurwanya iterabwoba Marc Trévidic na Nathalie Poux bari barashyizeho itsinda ry’impuguke rigizwe n’inzobere mu gupima imirongo, ibirari by’amasasu (balistique), ibiturika n’inkongi (explosifs et incendie), n’inyurajwi (acoustique), kugira ngo bazakore isesengura ku cyerekezo cyaturutsemo ibisasu byo mu bwoko bwa missiles byarashwe iyo ndege, igikorwa gifatwa nk’imbarutso ya Jenoside yakorewe Abatutsi.

Iki kinyamakuru gitangaza ko muri iyi raporo handitswemo ko ibisasu byarashwe kuri iyi ndege ya Habyarimana bitarashwe n’ingabo za FPR zari i Masaka, ku musozi uteyeho agashyamba uri ku bilometero bine uvuye ku kibuga mpuzamahanga cya Kanombe ahubwo byarashwe n’abari mu kigo cya gisirikare cya Kanombe cyari mu maboko y’abasirikare ba Habyarimana.

{{Gushaka guhirika ubutegetsi}}

Izi nzobere zagendeye ku bimenyetso no ku buhamya bw’abagabo babiri b’Ababiligi, umwe yahoze ari umuganga undi yari umusirikare wo mu rwego rwa Lieutenant-Colonel mu ngabo z’Abafaransa zirwanira mu mazi, wabaga mu nkambi y’ingabo z’u Rwanda i Kanombe.

Amakuru batanze yaje ashyigikira ibyatangajwe muri Raporo Mutsinzi yakozwe n’itsinda ryari ryashyizweho n’u Rwanda mu kumenya uwarashe iyi ndege, iyi raporo yemeje ko ibisasu byarashe iyi ndege byavuye mu nkambi ya Kanombe.

Ikinyamakuru 20minutes.fr kivuga ati: “Biragoye gutekereza ko byakozwe na FPR”.

Iyi raporo yakozwe yerekana ko Habyarimana yarashwe n’abahezanguni bari mu ngabo z’u Rwanda (FAR) bashakaga kwikiza Perezida Habyarimana, kugira ngo haburizwemo ishyira ku mukono ry’amasezerano y’Arusha no gushyira mu bikorwa umugambi wo kwica Abatutsi.

Iyi raporo ya Trévidic ivuga ko ubwo Perezida Juvénal Habyarimana, yavaga muri Tanzania ku ya 6 Mata 1994, bwari bwije. Bitewe n’uko hari umutekano muke, abamurindaga b’Abafaransa bamusabye ko yareka kuza mu Rwanda ahubwo akazaza bukeye bwaho. Ariko bamwe mu bayobozi muri leta ye bahise bamushyiraho igitutu ko bava muri iyi nama vuba yaberaga i Dar es-Salaam bagataha, aho yagarukanye mu ndege na mugenzi we w’u Burundi, Cyprien Ntaryamira, nawe wari mu nama.

{{Uko Leta y’u Rwanda ibibona}}

Ku ruhande rwa leta y’u Rwanda yishimiye ibyavuye muri icyo cyegeranyo, aho minisitiri w’ububanyi n’amahanga Louise Mushikiwabo mu izina rya Guverinoma yatangaje ati “ Ibyabaye uyu munsi bishimangira ibitekerezo u Rwanda rumaranye igihe kuri iki kibazo… Bifashishije ukuri gushingiye ku buhanga, abacamanza Trévidic na Poux bafunze burundu umuryango ku bamaze imyaka 17 bahakana Jenoside no kurenganya abo yakozeho. Kuri ubu noneho biragaragara ko guhanura indege cyari igikorwa cya kudeta cyakozwe n’Abahutu b’abahezanguni n’abajyanama babo bayoboraga ikigo cya Kanombe.”

Leta y’u Rwanda kandi yafashe icyo cyegeranyo nk’icyaturutse mu iperereza rikozwe neza ryashyizwe mu bikorwa n’abacamanza b’inararibonye bafashijwe n’impuguke zo ku rwego mpuzamahanga. Mushikiwabo ati “ Abanyarwanda bakiriye icyo cyegeranyo kigira ibyo cyerekana ku gice kimwe cy’amateka y’igihugu cyacu. Tuzakomeza tudatezuka igikorwa cyo kubaka igihugu dukorera ahazaza.”

Bamwe mu bitabiriye itangazwa ry’icyegeranyo:

{{Amashusho ya Al Jazeera ahamya ko nta ruhare Perezida Kagame yagize mu ihanurwa ry’indege yari itwaye Perezida Habyarimana}}

{{Foto: A.R}}