IGIHE Kinyarwanda

{Gusenga ni ibintu bifasha mu buzima kuko hari byinshi bikoreka ku bw’amasengesho. Kuba ukina umupira usenga ngo bibasha kukurinda ingorane nyinshi mu buzima nk’uko twabitangarijwe na Emmery Bayisenge. }

Tumaze kuganira na bamwe mu bari bitabiriye igiterane cyo gushima Imana cyari cyabereye kuri FERWAFA kikitabirwa n’abakozi b’Imana batandukanye, abana bo muri academy ya FERWAFA, ndetse n’abandi bakinnyi bo mu makipe atandukanye yo mu Rwanda babaye muri iyi academy, byatumye isange.com yegera kapiteni w’Amavubi mato Emmery Bayisenge kugirango aduhe ubuhamya bwe ku byerekeranye no gusenga.

Emmery Bayisenge ni kapiteni w’Amavubi mato, akaba ari umusore ushinguye w’igihagararo kigaragara. Abamubona akina bemeza ko ari n’umuhanga, ibi bigatuma agirirwa icyizere cyo kuyobora abandi mu kibuga. Umurava kuri we nturangirira mu kibuga gusa, kuko no gusenga yemeza ko ari ubuzima bwe kandi bikaba bimufasha kugera ku byo yifuza byose. Yemeza ko we na bagenzi be bahuriye mu ikipe badahwema kwiragiza Imana kugirango ijye ibashoboza kugera ku ntsinzi.

Mu buhamya bwe ashima Imana wasangaga bwibanda ku byo Imana yamugejejeho ari mu Mavubi, by’umwihariko ubwo bajyaga mu gikombe cy’isi cy’abatarengeje imyaka 17 cyabereye muri Mexique.

Abakinnyi bo mu Mavubi mato (ubu yahindutse isonga FC) usanga gusenga ari ikintu bashyize imbere nyuma y’umurimo bahamagariwe wo guconga ruhago. Nk’ahandi hose hahurira abantu batandukanye kandi bashyize umutima hamwe, hatarebwe idini umuntu akomokamo.

Muri academy ya FERWAFA bagira amateraniro buri wa kabiri no kuwa gatandatu mu rwego rwo gusangira ijambo ry’Imana no gushima Imana ibyiza ibakorera. Ibi babifashwamo n’itsinda ry’abakozi b’Imana bayobowe na Madamu Nyiraneza Thérèse, wanatangije umurimo w’ivugabutumwa muri bariya bakinnyi bakunze guserukira igihugu. Si abakinnyi bitabira aya materaniro gusa kuko rimwe na rimwe n’abatoza baba bashobora kuyitabira.

Kugira ubuzima bufite intego ni kimwe mu bishobora gutuma umuntu agera ku cyo yifuza bitamugoye, kuko aba afite amahitamo ahamye. Benshi muri aba bakinnyi barimo na Bayisenge ubwe, bakaba barabikemuye kare.

Emmery Bayisenge yagize icyo yisabira ababyeyi aho yagize ati: ” Ababyeyi nibafate iya mbere mu gutoza abana babo umuco wo gusenga, kuko bifasha mu gihe cy’ubu n’ikizaza mu buzima bw’umuntu, bikaba akarusho iyo umwana abitojwe akiri muto akabikuriramo.”