IGIHE Kinyarwanda

Igipimo cy’abarimu bo mu mashuri abanza bageze ku rwego rwa intermediate mu Cyongereza cyahawe amanota 4,21% mu isuzuma rya RGB, hashingiwe ku kugereranya 4% bari bageze kuri urwo rwego n’intego ya 95%.

Ibi ntibisobanura ko abarimu 96% basigaye batazi Icyongereza na gato, ahubwo ko batari bageze ku rwego rw’ubumenyi rwafashwe nk’igipimo ngenderwaho muri iryo suzuma.

Mu mashuri yisumbuye ho bihagaze bite?

Ubushakashatsi bugaragaza ko mu barimu bigisha mu mashuri yisumbuye asanzwe n’ayo mu myuga n’ubumenyingiro (TVET), abari bageze ku rwego rw’Icyongereza rwasabwaga bari 45%, mu gihe intego yari 80%.

Iki gipimo cyahawe amanota 56,25%, ugereranyije n’amanota 4,21% yahawe icy’abigisha mu mashuri abanza.

Muri rusange, igipimo RGB yatanze ku bumenyi bw’Icyongereza bw’abarimu bo mu mashuri abanza n’ayisumbuye cyagize amanota 30,23%.

Iyi mibare ishimangira ko ubumenyi bw’ururimi rwifashishwa mu kwigisha bukiri kimwe mu bikeneye kongererwa imbaraga mu rwego rw’uburezi.

Nubwo ibi bipimo bigaragaza icyuho mu bumenyi bw’Icyongereza, RGB yerekana ko hari ingamba zatangiye gushyirwa mu bikorwa mu gufasha abarimu kongera ubushobozi.

Raporo inavuga ko muri Mutarama 2026 hatanzwe mudasobwa zigendanwa zisaga 15.000 mu mashuri, kugira ngo zifashe abarimu kwitabira amahugurwa akorerwa kuri internet no kongera ubushobozi mu ikoranabuhanga.

Usibye ibijyanye n’indimi, mu mashuri abanza, umwarimu umwe wabihuguriwe abarirwa abanyeshuri 59, mu gihe intego ari 49. Mu mashuri y’incuke ho, umwarimu umwe wabihuguriwe abarirwa abana 95, ugereranyije n’intego ya 32.

Mu bijyanye no gukoresha ikoranabuhanga mu myigishirize, amashuri 40,8% ni yo yakoreshaga ikoranabuhanga mu kwigisha no kwiga, mu gihe intego yari 65%, hashingiwe ku mibare ya MINEDUC yo mu 2025.