IGIHE Kinyarwanda

{Umushinga w’Amayaga wizihije isabukuru y’umwaka umwe umaze ushinzwe ari nako unafasha abatuye icyaro, mu bikorwa by’iterambere. Bamwe muri abo baturage ubu bahuguwe kubyaza inyanya umusaruro.}

Uyu muryango udaharanira inyungu ufite gahunda yo guteza imbere akarere k’Amayaga. Ibirori byo kwizihiza isavukuru y’umwaka umwe umaze ushinzwe byahuriranye n’imuhango wo gusoza amahugurwa yo kurwanya ruswa n’akarengane yakorewe abayobozi 101 bo mu nzego z’ibanze bo mu Mirenge ya Muyira, Ntyazo na Kibilizi, n’amahugurwa y’urubyiruko 25 mu gutunganya inyanya mo ketchup na Konfitire.

Amahugurwa yo kurwanya ruswa yateguwe na AIPD (Amayaga Integrated Project for Development) ku bufatanye n’Urwego rw’Umuvunyi naho ayo gutunganya inyanya yateguwe ku bufatanye n’Ikigo cy’Ubudage Gishinzwe Iterambere GIZ, hamwe n’Ikigo Nyarwanda gishinzwe guteza imbere ubumenyingiro WDA.

Uwo muhango wabereye I Busoro mu Karere ka Nyanza witabiriwe n’abaturage banyuranye,harimo abanyamuryango b’amakoperative akorana na AIPD.

Nzaramba yongeyeho ko mu gihe cy’umwaka AIPD itangiye imaze gukora byinshi, harimo no gushyiraho ikigo gito cy’ishoramari gifite umushinga wo gushyiraho uruganda runini rutunganya inyanya, kuri ubu hakaba hararangiye gukorwa kechup na konfitire (Confiture), ari nabyo urwo rubyiruko rwahuguwemo ibyo bikazafasha AIPD kugera ku nshingano zayo.

Uwari uhagarariye Urwego rw’Umuvunyi Rumaziminsi Ntagwabira Seraphin ushinzwe gukumira no kurwanya akarengane muri urwo rwego, yibanze ku gusobanura ububi bwa ruswa n’ingamba igihugu gifite mu kuyikumira no kuyirwanya.

Umunyamabanga Nshingwabikorwa w’Umurenge wa Busoro NKUNDIYE Jean Pierre wari uhagarariye ubuyobozi bw’Akarere, yashimye cyane Ubuyobozi Bwa AIPD n’intambwe bumaze gutera mu Mayaga, yongeyeho ko amahugurwa nk’ayo iyo ateguwe atagomba kuba amasigaracyicaro. Yagize ati:” Aya mahugurwa nimuyabyaze umusaruro baba ari abahuguwe ku kurwanya ruswa n’akarengane, cyangwa se mu gutunganya inyanya”.

Umwe mubahuguwe Ndimubandi Jean Nepomuscene, yagize ati:”Aya mahugurwa yangiriye akamaro kuko ahanini ibyo twahuguwemo bitandukanye cyane n’ibyo twakoraga tuzi ko ari umuco”.

Naho Mutegwaraba Marie Claire wahuguwe ku gutunganya inyanya, we yavuze ko hari ibyo bajyaga babona mu maduka manini batazi ko nabo babyikorera. Yagize ati:”Ubu najye mfite ubushobozi bwo kwikorera confiture na ketchup by’inyanya nkabikorera mu rugo cyangwa nkabigurisha.”

Uwo muhango kandi waranzwe no gutanga impano z’ishimo ku bateye inkunga amahugurwa, Urwego rw’Umuvunyi, Ubuyobozi bw’Akarere ka Nyanza nk’Umufatanyabikorwa ,Ikigo cy’igihugu Gishinzwe Ubumenyingiro WDA na GIZ .

AIPD ni umuryango washinzwe n’Urubyiruko nyuma y’umubonano na Perezida wa Repubulika, ubwo yabashishikarizaga kwita ku iterambere ry’umuturage wo mu cyaro, gahunda za AIPD zikubiye mu ntego 3 arizo: kuzamura Amakoperative yo mu cyaro, kurwanya ruswa n’akarengane, no Guteza imbere ikoranabuhanga mu cyaro.