IGIHE Kinyarwanda

{Umubare w’abakobwa bagenda batwara inda bari mu mashuri abanza mu gihugu cy’u Burundi ugenda urushaho kwiyongera ugereranyije n’umwaka ushize wa 2011.}

Mu cyegeranyo cyatambukijwe kuri radiyo y’igihugu ku munsi wo cyumweru gishize tariki 8 Mutarama, ubwiyongere bw’abana b’abakobwa batwara inda zindaro bari mu mashuri abanza urushaho gufata indi ntera by’umwihariko mu Ntara ya Rutana iherereye mu Majyapfo ashyira Uburasirazuba bw’iki gihugu ndetse no mu ntara ya Cibitoke iherereye mu Burengerazuba bw’igihugu.

Umuyobozi w’intara ushinzwe uburezi mu ntara ya Rutana, Simon Ngenzabuhoro yasabye ababyeyi ko bwakwiye guhana no guhanura abana babo nk’uko ubuyobozi bubigeza.

Ibi byajyanye n’uko Ngenzabuhoro yongeye gusaba abayobozi b’amasono ko bakwiye gusaba abarezi gukurikiranira hafi uburezi n’ubumenyi bw’abana.

Ku rundi ruhande abarimu bagaragayeho ibyaha byo gutera inda abana bigisha basezerewe ku mirimo yabo, aha hatanzwe urugero mu Ntara ya Cibitoki aho umwarimu w’imyaka 60 y’amavuko wigishaga ku kigo cy’amashuri abanza cya Buhoro kamwe mu duce tw’aka karere wateye umwana w’umukobwa inda.

Saidi Anicet umuyobozi w’uburezi mu Ntara ya Cibitoki yatangaje ko uretse kuba birukana abarimu, banenga ababyeyi nabo badakurikirana imikorere yaba bana.

Anicet yakomeje avuga ko ababyeyi benshi iyo bamenye abateye abana babo inda bakunze kubahishora ntibabageze mu nzira y’ubutabera nk’uko iba ikenewee.

Mu mwaka ushize wa 2011, mu ntara ya Cibikoki, mu karere ka Mabayi habaruwe abakobwa 30 bavuye mu ishuri bitewe n’uko bakuriwe bakaba badashobora gukomeza kwicara ku ntebe y’ishuri mu mahoro.