IGIHE Kinyarwanda

{Ishami ry’Umuryango w’Abibumbye ryita ku mpunzi (UNHCR) riratangaza ko ritazigera ryotsa igitutu impunzi z’Abanyarwanda ribasaba gutahuka mu gihugu cyabo.}

Lusakatimes dukesha iyi nkuru gitangaza ko UNHCR ikomeje gahunda yayo yo gushaka igisubizo ku mpunzi z’Abanyarwanda ziri hirya no hino kuko mu gihe gito ibyo kwitwa impunzi bizahagarara.

Ms. Joyce Mends-Cole uhagarariye iri shami mu gihugu cya Zambia avuga nta Munyarwanda bazacyura ku ngufu.

Ati:”Ntituzishora mu bikorwa byo gucyura abantu ku ngufu; icyo tuzakora ni ugufasha abifuza gutaha ku bushake bwabo”.

Muri Kamena umwaka ushize, Perezida wa Zambia Rupiya Banda yari yemereye impunzi z’Abanyarwanda n’Abarundi zidashaka gutaha ko zishobora kwigumirayo zibaka Abazambiya.

Hashize igihe kitari gito impunzi z’Abanyarwanda zikangurirwa gutaha ku bushake, babwirwa ko igihugu cyabo gifite amahoro n’umutekano akaba ari no muri uru rwego hari abazanwa mu Rwanda baje kunyomoza niba ibyo babwiwe ari ukuri.

Imibare ya UNCHR yerekana ko Abanyarwanda bagera kuri 3.424.919 bari barahungiye mu bihugu bitandukanye nibo bamaze gutahuka kuva mu mwaka 1994, abari munsi y’ibihumbi ijana akaba aribo bakiri hanze y’u Rwanda.

Abanyarwanda batangiye guhunga igihugu ku bwinshi kuva mu mwaka w’1959 ubwo amacakubiri ashingiye ku moko yatangiraga, abandi bahunga mu w’1994 mu gihe cya Jenoside yakorewe Abatutsi, abandi nabo bahunga hagati y’1997 na 1998 ubwo abacengezi bateraga amajyaruguru y’ u Rwanda.

Biteganyijwe ko icyemezo cyo gukuraho ubuhunzi ku Banyarwanda kizashyirwa mu ngiro kuwa 30 Kamena 2012.