Post
Minisitiri Nsengimana yatangiye gusura urubyiruko mu turere
{Minisitiri w’Urubyiruko Jean Philibert Nsengimana, kuri uyu wa Kane tariki ya 02 Gashyantare 2012, yagendereye ibikorwa bitandukanye by’urubyiruko mu karere ka Gasabo muri gahunda yateguwe na minisiteri y’Urubyiruko yo gusura uturere twose tw’igihugu. }
Ibikorwa byasuwe bikaba ari iby’amakoperative y’urubyiruko abarizwa mu mirenge itandukanye y’akarere ka Gasabo. Ayo makoperative akaba ari: Rengera Ibidukikije Witeza Imbere (RIWI) ikora ibikorwa by’ubuhinzi n’ubworozi mu murenge wa Nduba, koperative AJDR ikora ibijyanye n’ubucuzi bw’imbabura mu murenge wa Kimironko, ndetse n’ishyirahamwe ry’abatwara moto ATAMIMORWA, rinafite ibindi bikorwa bitandukanye rikorera mu murenge wa Kimironko.
Muri uru ruzinduko minisitiri Nsengimana akaba yashimye byimazeyo ishyirahamwe ATAMIMORWA ry’urubyiruko rutwara moto, ku bw’ibikorwa rwigejejeho ndetse no kuba rufite umugambi n’intumbero bifatika by’ahazaza.
Yagize ati: “Icyo nabonye aha ni icyizere, kubona twajyaga twibaza uko tuzabona aho urubyiruko rwigishirizwa i Wawa ruzajya rukorera imyuga none ATAMIMORWA yemeye gufata 300 muri bo ikabamenyereza ubuhinzi n’ubworozi bya kijyambere ni icyizere gikomeye.”
Ishyirahamwe ATAMIMORWA ryemeye gufata abana 300 bavuye i Wawa rikabamenyereza rikabaha n’akazi, rigizwe n’urubyiruko rwatangiye rutwara amagare, ruza kujya ku tumoto duto tuzwi nk’uduhene, none rusigaye rutwara moto nini. Uru rubyiruko rufite kandi n’ibindi bikorwa bifasha mu guteza imbere urubyiruko muri rusange nk’ishuri ryigisha gutwara ibinyabiziga kuri Stade Amahoro, n’ubuhinzi bw’imboga n’ubworozi bw’inkoko n’ingurube biri i Gasogi.
ATAMIMORWA ikaba yanagabiye inka y’inzungu Minisiteri y’Urubyiruko ngo nayo izayigabire urundi rubyiruko rukiri mu bukene rubashe kwizamura, mu gikorwa minisitiri yahise yita ko ari “Gira inka rubyiruko.”
Umuyobozi w’iri shyirahamwe, Evode Nzitunga, yavuze ko bishimiye kuba bari mu mashyiramwe n’ibikorwa by’urubyiruko bya mbere Minisitiri asuye kuva yajya muri iyi mirimo, anavuga ko bafite imigambi myinshi yo guteza imbere koperative yabo ndetse n’urubyiruko rw’Abanyarwanda muri rusange babigisha imyuga itandukanye.
Iki ni icyiciro cya mbere cy’iyi gahunda yo gusura urubyiruko mu turere, cyatangijwe uyu munsi haherewe kuri Gasabo kikazasozwa tariki 09 z’uku kwezi, hakazasurwa uturere 16, utundi tukazasurwa mu kindi cyiciro.