IGIHE Kinyarwanda

{Minisitiri ufite iterambere ry’umuryango mu nshingano ze Aloisea Inyumba ari mu bagore 3 bazagenerwa umudali w’ishimwe nk’impirimbanyi zaharaniye uburenganzira bw’abandi mu bihugu barimo. Ni umudali w’ishimwe witwa ‘Women have Wings Courage Award’.}

Amakuru dukesha urubuga rwa internet rwa Minisiteri y’Umuryango, avuga ko iki ari igihembo kizahabwa abagore nka Virisila Buadromo ukomoka mu gihugu cya Fiji na Chi Yvonne Leina ukomoka muri Cameroon. Ni abagore bazwi mu bihugu byabo kuba baza ku isonga mu kurengera uburenganzira bwa muntu.

Minisitiri Inyumba we azwiho kuba ari umukangurambaga, washishikarije abantu kujya kubohora u Rwanda.

Uyu munyarwandakazi wabaye mu myanya ya politiki mu Rwanda kuva mu w’ 1994, azwiho kurengera inyungu z’abagore n’abana. Ari mu bongeye kuzanzamura impuzamiryango Pro-Femmes Twese Hamwe nyuma ya jenoside, n’indi miryango inyuranye iharanarira uburenganzira bw’umugore.

Iki gihembo cyagenewe Inyumba Aloysia gitangwa n’umuryango w’Abanyamerika Women Have Wings, ugenekereje mu Kinyarwanda bivuze ko abagore bagira amababa.

Ibi nibyo bihembo bya mbere bitanzwe n’uyu muryango, kandi ngo bizajya bitangwa buri mwaka ku bagore batanga umusanzu mu guhindura sosiyete barimo ifite ibibazo.

‘Women Have Wings Courage Award’ ni igihembo cyitiriwe Umunyamerikakazi Amelia Earhart, uzwi mu mateka nk’umupilote wa mbere w’umugore washoboye gutinyura abandi bagore gukora imirimo idasanzwe imenyerewe ku bagore. Azwiho kuba yaranditse ibitabo byinshi byakanguriye abagore kujya kwiga ibyo gutwara indege.

{{Inkuru dukesha ORINFOR}}