IGIHE Kinyarwanda

{Kagabo Jake wari warahawe inshingano z’ubujyanama muri Studio Bridge Records ishami rya Kigali yahagaritswe kuri iyo mirimo kubera imicungire mibi y’ibikoresho no kutita ku nyungu za Studio nk’uko Jacques Uwizeye uzwi cyane nka Jack Ross, umuyobozi mukuru w’iyi Studio, yabitangarije IGIHE.com.}

Mu kiganiro binyuze kuri Facebook na Jack Ross, uri muri Canada, ahari irindi shami rya Bridge Records, yavuze ko yahagaritse Kagabo kuko yakomeje kumusaba guhindura imikorere ariko na n’ubu akaba yarinangiye. Anavuga kandi ko agaragaza agasuzuguro mu kazi ke.

Yagize ati:”Hashize ukwezi mpaye Kagabo amabwiriza (notice) yo kwisubiraho ndetse no kubahiriza amasezerano yasinyiye ariko ntiyayubahirije na gato kuko maze igihe mwandikira ntasubize ndetse namuhamagara ntiyitabe telefone ye. So, urumva ko ntakomeza gukorana n’umuntu ntazi ibyo arimo kdi ntanakumenyeshe uko ibintu birikugenda”.

Jack Ross avuga ko Kagabo yananiwe guteza imbere ishami rishya rikora amashusho rya Bridge Films. Akavuga ko ahubwo bimwe mu bikoresho byangirikaga ibindi bikabura kandi yaramushinze kubirinda. Jack Ross anavuga ko uretse kuba atemerewe kugira itegeko atanga muri iyo studio Kagabo atemerewe no kongera gutunga imfunguzo z’ahabikwa ibikoresho bya Kampani guhera kuri uyu wa Mbere tariki ya 23 Mutarama 2012.

Anavuga kandi ko ibyo bikoresho byose agomba kubiryozwa. Yagize ati:”N’ubwo ahagaritswe agomba kuzishyura Camera Professionel, amatara, ibyo guterekaho ibyuma, n’ibindi bikoresho by’indangururamajwi dore ko mubyo yari yasinyiye harimo no kwita ku bikoresho akazabisubiza uko yabihawe turamutse turetse gukorana”.

Jack Ross avuga ko iyi studio izaba iri mu maboko y’ushinzwe gukurikirana umuntungo, uzaba uri gukorana n’abatunganya indirimbo bo muri iyi studio mu gihe agishaka ubuyobozi bundi.

Mu kiganiro ku murongo wa Telefone na Kagabo Jake, we yavuze ko ibyo atabizi, gusa avuga ko azabitubwiraho ku buryo burambuye ku munsi ukurikiraho nitwamusura aho iyi Studio ikorera i Nyamirambo.

– Ushaka kumenya amateka n’ubuzima bw’abahanzi nyarwanda ukunda wakanda [HANO->http://igihe.com/spip.php?rubrique130] .
– Soma inkuru zakunzwe kurusha izindi mu myidagaduro ukanda [HANO->http://igihe.com/spip.php?rubrique13#] .

{Hejuru ku Ifoto: Uhereye i Bumoso ni Kagabo Jake na Jack Ross.}