IGIHE Kinyarwanda

{Guhera tariki ya 21 Mutarama kugera tariki ya 12 Gashyantare 2012 muri Gabon na Guinée Equatoriale hateganyijwe kubera imikino ya nyuma y’ igikombe cy’Afurika mu mupira w’amaguru CAN 2012.}

Nyuma y’aho ikipe y’ igihugu ya Misiri yegukaniye CAN 2010 yabereye mu gihugu cya Angola hagati y’amatariki ya 10-31 Mutarama 2010, abenshi batangiye kwibaza igihugu cyizegukana iri rushanwa rizaba ku nshuro yaryo ya 28.

Umukino uzafungura CAN 2012 uzahuza ikipe y’igihugu ya Guinée Equatoriale na Libiya kuri Stade ya Bata ijyamo abafana ibihumbi 40 (40000) iri mu gihugu cya Guinée Equatoriale; umukino wa nyuma uzabera mu gihugu cya Gabon kuri Stade ya Angondjé ijyamo abafana 45 000.

Amakipe y’ ibihugu 5: Ghana , Côte d’Ivoire , Maroc ,Tunisie na Soudan mu makipe 16 azitabira iri rushanwa niyo afite iki gikombe nibura inshuro imwe.

{{Amateka yatangiye guhinduka muri CAN ! }}

Amwe mu makipe afatwa nk’ ibihangange ku mugabane w’Afurika ntiyorohewe mu mikino yo mu majonjora ubwo hashakishwaga amakipe azitabira CAN 2012.

Mu mikino ya nyuma y’ igikombe cy’Afurika izabera mu gihugu cya Gabon na Guinée Equatoriale guhera tariki ya 21 Mutarama kugera tariki ya 12 Gashyantare 2012 amwe mu makipe y’ ibihangange yasigaye ku rugo. Ayo ni ikipe y’ igihugu ya Misiri yaherukaga kwegukana iki gikombe inshuro 3 yikurikiranya (2006, 2008 na 2010), ikipe y’igihugu ya Cameroun n’abakinnyi bayo bibihangange nka Samuel Eto’o, ikipe y’igihugu ya Nigeria n’ayandi.

Ikipe y’igihugu ya Botswana, Niger na Guinée Equatoriale mu mateka yazo zizitabira bwa mbere imikino ya nyuma y’igikombe cy’Afurika, ikipe y’ igihugu ya Soudan niyo yonyine yo mu karere ka CECAFA izitabira iri rushanwa.

Ikipe y’ igihugu ya Libiya yabonye itike yo gukina iyi mikino mu gihe igihugu cyari cyugarijwe n’ intambara.

Sénégal, Mali (n’ umutoza wayo Alain Giresse), Maroc (n’umutoza Eric Gerets) na Ghana (n’ubwo izaba idafite Michael Essien) ni amwe mu makipe ari guhabwa amahirwe yo kwegukana iki gikombe.

Ni ku nshuro ya kabiri mu mateka y’ igikombe cy’Afurika ubwo imikino ya nyuma izabera mu bihugu 2 ( CAN 2000 yabereye mu gihugu cya Ghana na Nigeria).

{{Amakipe 16 azitabira CAN 2012 n’uko yashyizwe mu matsinda}}

– Itsinda A : Guinée Equatoriale, Libye, Sénégal na Zambia.

-Itsinda B : Burkina Faso, Côte d’Ivoire, Soudan na Angola.

-Itsinda C : Maroc, Niger, Tunisie na Gabon.

Itsinda D : Botswana, Ghana, Guinée na Mali.

{{Icyo wamenya mu mateka ya CAN}}

– Imikino y’igikombe cy’ Afurika itegurwa n’ ishyirahamwe ry’ umupira w’amaguru muri Afurika (CAF).

– Igikombe cya mbere cya CAN cyakiniwe muri Soudan mu mwaka w’ 1957 cyegukanwa n’ ikipe y’ igihugu ya Misiri itsinze Ethiopia igitego 1-0 .
– Ikipe y’igihugu ya Misiri niyo ifite iki gikombe inshuro nyinshi 7 (1957, 1959, 1986, 1998, 2006, 2008 na 2010).

– Rutahizamu w’ ikipe y’igihugu ya Cameroun Samuel Eto’o Fils n’ibitego 18 niwe umaze gutsinda ibitego byinshi mu mateka ya CAN.

– Rutahizamu w’ ikipe y’ igihugu ya Repubulika Iharanira Demokarasi ya Congo Mulamba Ndaye watsinze ibitego 9 muri CAN 1974 niwe umaze gutsinda ibitego byinshi mu irushanwa rimwe.

– Abanyamisiri Essam al-Hadary na Ahmed Hassan nibo bakinnyi babashije kwegukana iki gikombe inshuro nyinshi, 4 (1998, 2006, 2008, 2010).

– Umunya Cameroun Rigobert Song wakinnye imikino 36 mu marushanwa 8 yitabiriye niwe mukinnyi umaze gukina imikino myinshi no kwitabira iri rushanwa inshuro nyinshi mu mateka ya CAN.

– Uwigeze gutoza ikipe y’ igihugu ya Ghana Charles Kumi Gyamf akegukana ibikombe bya CAN bitatu (1963, 1965 na 1982) niwe mutoza ufite iki gikombe inshuro nyinshi.

– Igitego cyihuse mu mateka ya CAN cyatsinzwe n’umunyamisiri Ayman Mansour ku isegonda rya 23 atsinda Gabon; hari muri CAN 1994.

-Mahmoud El-Gohary yegukanye iki gikombe ari umukinnyi mu mwaka 1959, yongera kucyegukana ari umutoza mu mwaka w’1998.

– Guhera mu mwaka 2013, imikino y’igikombe cy’ Afurika izatangira kuba mu mwaka w’igiharwe, Afurika y’ Epfo niyo izategura CAN 2013.

{{Uko amakipe yagiye atwara CAN kuva mu mwaka w’i 2000}}

2010 Misiri

2008 Misiri

2006 Misiri

2004 Tunisia

2002 Cameroun

2000 Cameroun

Twibutse ko ikipe y’ igihugu Amavubi yasezerewe mu mikino y’amajonjora mu matsinda, aho u Rwanda rwari kumwe n’ ikipe y’ igihugu ya Côte d’Ivoire, Benin n’ u Burundi mu itsinda H.

Mu mukino wa mbere u Rwanda rwatsinzwe na Côte d’Ivoire ibitego 3-0, ku mukino wa kabiri Benin itsinda Amavubi ibitego 3-0 i Kigali, ku mukino wa gatatu u Rwanda rutsinda u Burundi 3-1, ku mukino wa kane u Rwanda rutsindwa n’ u Burundi 3-1.

Ku mukino wa gatanu u Rwanda rwanyagiwe na Côte d’Ivoire ibitego 5-0 i Kigali byanaviriyemo umutoza Sellas Tetteh kwegura; ku mukino wa nyuma wo mu matsinda u Rwanda rwatsinze Benin igitego 1-0.

Ikipe y’igihugu Amavubi yarangije imikino yo mu itsinda H iri ku mwanya wa 2 n’amanota 6 inyuma ya Côte d’Ivoire yatsinze imikino yayo yose, ikipe ya Benin n’ u Burundi zarangije zifite amanota 4.